Tapisserieë teen die kamermuur,
en op die uitgekerfde kanferkis
'n ornament van suiwer ametis.
Die mat en meubels luuks en peperduur.
Ou silwerskale, swaar en blinkgeskuur,
glim kosbaar in 'n skemerige nis;
drie skywe wat van koperdryfwerk is,
weerkaats die skynsel van die kaggelvuur.
'n Laaste kelkie vlamgeel vonkelwyn
het ons geselskap afgerond. Alleen,
terwyl ons elf-uur dralend deur toe loop,
was in haar oë 'n skaduwee van pyn.
In hierdie huis ontbreek daar net een
item wat goud en silwer nie kan koop.
No comments:
Post a Comment